Murojaatlar ijrosi ta’minlandi

Surxondaryo viloyati hokimi tumanlardagi iqtisodiy va boshqa barcha yo‘nalishlarda ketayotgan o‘zgarishlarni, mavjud muammo va kamchiliklarni o‘rganish maqsadida hududlar kesimida o‘rganish ishlarini olib borar ekan, albatta, keng jamoatchilik fikriga, muammo va murojaatlariga ham quloq tutishi odat tusiga kirgan.
Navbatdagi ana shunday uchrashuv Boysun tumani “Pulhokim” mahallasida tashkil etilib, bu safar ham viloyat hokimi aholi bilan uchrashib, ularning murojaatlarini tinglagan edi. Qabulda ko‘tarilgan qator masalalar hal etilib, mahallada keng ko‘lamli ishlar amalga oshirilgani esa e’tirof etarli jihat.
Xususan, mahallaning 1,5 kilometr yo‘li asfaltlandi, qariyb 1 kilometr piyodalar yo‘lagi qurildi va yo‘l bo‘ylab quyosh panelli ko‘cha yoritish chiroqlari o‘rnatildi. Shuningdek, mahallaning 6,6 kilometr tuproq yo‘llariga tosh-shag‘al yotqizilib, ta’mirlandi. Amalga oshirilgan ishlarning qanday ketayotgani esa doimiy nazorat ostida. Natijada esa mahallaning “Bog‘chasaroy” ko‘chasi foydalanishga topshirildi.