Bugun hayajonli kun. Maktablarda “Yangi hayot uchun, Yangi O‘zbekiston uchun” shiori ostida birinchi qo‘ng‘iroq jarang sochdi va yangi o‘quv yili boshlandi. Termiz tumanidagi 5-sonli umumta’lim maktabining o‘quvchi yoshlari ham ana shunday kechinmalarni boshidan kechirdilar.
O‘quv yilining ilk kunida mustaqilligimizning 32 yilligi bayrami hamda “Bilimlar kuni” keng nishonlandi. Tadbir o‘quvchi va ustozlar, ota-onalar bilan yanada fayzli o‘tdi. Ushbu quvonchli daqiqalarga Termiz tumani Shuxrat Nazarov ham sherik bo‘lib, ustoz va murabbiylar hamda o‘quvchilarni yangi o‘quv yili bilan qutlab, ularga omadlar tiladi.
Keyingi navbat esa maktab o‘quvchilari tomonidan tayyorlangan dasturga berildi. Ular ijrosidagi ajoyib ko‘y-qo‘shiq va raqslar yig‘ilganlarga bayramona kayfiyat ulashdi. Shuningdek, tadbir davomida maktabga ilk marotaba qadam qo‘ygan 1-sinf o‘quvchilariga “Prezident sovg‘alari” tantanali topshirildi.
