Hunardan kelsa boylik…

Uyda pishirilgan non mazali va to‘yimli. Boshqa tomondan bu kunda yoki kun ora non sotib olishdan, ortiqcha sarf-xarajatlardan asraydi. Issiq non dimog‘imizga urilishi bilan ishtahamiz ochilishi aniq. Non pechida pishirilgan nondan tandirda yopilganining mazasini yaxshi bilamiz. Qadimdan non yopishda tandirdan foydalanib kelinganini hisobga oladigan bo‘lsak, bu xalqimizda avloddan-avlodga o‘tib kelayotgan an’anadek gap.
Bizga shirmoy nonlarni tortiq qiladigan tandirlarni yasashning ham o‘z sir-sinoati bor. Uni istagan tuproqdan yasab bo‘lmaydi. Bu Angor tumanining “Qorasuv” mahallasida yashovchi Ro‘ziyevlar oilasining har bir vakili yaxshi biladi. Sababi tandirchilik ularning ota-bobolaridan meros kasb-hunardir. Ular yerga tandirning qolipini olishgan bo‘lib, tandir chiqadigan tuproqdan tayyorlanib, kerakli ishlov berilgan loydan tandir yasaydilar. Tandir tayyor bo‘lgach esa xaridorlarga yetkaziladi.
— Men bu kasbni otamdan o‘rganib, farzandlarimga ham o‘rgatganman, deydi asli kasbi o‘qituvchi bo‘lgan hunarmand Rustam Ro‘ziyev. — Bu hunarni yarim asrdan buyon oilaviy davom etib kelayapmiz. Hunarimiz ortidan oilamizga qo‘shimcha daromad topyapmiz. Daromadimizdan to‘ylar qildik, uylar qurdik. Birovdan kam bo‘lmadik.