Ziyoratgohga olib boruvchi yo‘l asfaltlanmoqda…

Oltinsoy tumanidagi So‘fi Olloyor ziyoratgohiga borgan bo‘lsangiz, yaxshi bilasiz, ushbu maskanga olib boruvchi yo‘l ta’mirtalab. Manzilga yetgunga qadar anchayin vaqt sarflab, uzoq va sabr bilan yurishingizga to‘g‘ri keladi. Aslida yo‘llar hududning iqtisodiy, turistik salohiyatini oshirishini inobatga oladigan bo‘lsak, ziyoratchilarning qadami uzilmaydigan ushbu go‘shani obod manzilga aylantirmoq, yo‘llarini esa asfaltlamoq lozim.
Surxondaryo viloyati hokimi topshirig‘iga asosan Vaxshivorda joylashgan So‘fi Olloyor hazratlari mangu qo‘nim topgan manzil yanada obod bo‘ladigan bo‘ldi. Ayni paytda esa ziyoratgohga olib boruvchi yo‘l asfaltlana boshlandi. Termiz shahrida joylashgan “Everest” MChJ xususiy korxonasi tomonidan 2,8 kilometrlik yo‘l qismi asfaltlanib, transport qatnovlariga qulaylik yaratiladi. Shu maqsadda 12 ta og‘ir yuk mashinasi va 3 ta maxsus texnika jalb etilib, belgilangan ishni jadal bajarishayotir.