Amir Temur mahallasi namunali mahallaga aylantirilayotir

Yurtimizda amalga oshirilayotgan barcha islohotlar, amaliy ishlar negizida xalq manfaati, turmush tarzini yaxshilash, hayotini farovonlashtirish maqsadi yotadi. Bunda birinchi qadam mahalladan boshlanishi maqsadga muvofiqdir. Shu sababdan ham Surxondaryo viloyati hokimining topshirig‘iga asosan Termiz tumanidagi 4 ta sektorda bittadan og‘ir hudud sifatida mahallalar tanlab olinib, amaliy ishlar boshlab yuborilgan.
Termiz tumanidagi 2-sektor rahbari, tuman prokurori Botir Oltiboyev Amir Temur mahallasida amalga oshirilayotgan ishlarni ishchi guruh a’zolari ishtirokida muhokama qilib, kelgusidagi vazifalar yuzasidan seminar o‘tkazdi. Seminar davomida mahalladagi har bir ko‘chaga tumandagi mutasaddi tashkilot va korxonalardan mas’ullar biriktirilib, byudjet tushumlarini tushirish, ko‘chalarga tosh-shag‘al yotqizish, mahallada obodonlashtirish ishlari olib borish yuzasidan tegishli ko‘rsatmalar berildi.
Shundan so‘ng, mutasaddilar mahalladagi xonadonlarda bo‘lib, aholining yashash sharoiti, ijtimoiy ahvoli bilan tanishishdi. Mavjud muammolarni bartaraf etish tadbirlari olib borildi. Har bir yo‘nalish bo‘yicha mas’ul tashkilotlar mahalla infratuzilmasini yaxshilash bo‘yicha ishlar davom ettirilayotir.