Oxirgi bir necha yil ichida “To‘polang” GESda misli ko‘rilmagan ishlar amalga oshirildi. Bu borada esa bosqichma-bosqich amalga oshirilgan ishlar yuzasidan ma’lumotlar berib bordik. Ishlar yakunlanib, loyiha yakuniy bosqichda. Holat bilan tanishish maqsadida esa Surxondaryo viloyati hokimi Ulug‘bek Qosimov “To‘polang” GESda bo‘lib, yakuniga yetkazilgan modernizasiya ishlarini ko‘zdan kechirdi. Viloyat rahbariga “O‘zbekgidroenergo” AJ raisi, senator Abdug‘ani Sanginov hamrohlik qildi.
Aytish kerakki, “To‘polang” GESda elektr energiya ishlab chiqarish barqarorligini ta’minlash maqsadida 75,4 million yevro sarflanib, rekonstruksiya ishlari amalga oshirildi. Oxirgi sinov ishlari davom etayotgan ayni vaqtda GESda 64 mVt elektr energiyasi ishlab chiqarilmoqda. Bu esa viloyatimizning 36 mingdan ortiq xonadonni ekologik toza elektr energiya bilan ta’minlash imkoniyatini tug‘dirayotir. Ayni paytda esa ushbu elektr energiyasi quvvati tarmoqqa uzatilmoqda.
Sinov ishlari yakunlangandan so‘ng esa “To‘polang” GES to‘liq quvvatda ishga tushiriladi, natijada 175 mVt elektr energiyasi ishlab chiqarila boshlanadi. Bu esa yillik 467 million kVt/soat elektr energiyasi iste’molchilarga uzatiladi degani. Loyihaning ishga tushirilishi nafaqat elektr energiyasining uzluksiz yetkazilishini ta’minlaydi, balki tabiiy gaz tejalishiga ham xizmat qiladi. Ya’ni, yillik 126,2 million metr/kub tabiiy gaz sarfi tejaladi.
