Tinib-tinchimagan tadbirli kishilar xonadonidagi bir qarich yeridan ham unumli foydalanib, foyda ko‘radi. Ammo, davlat tomonidan katta-katta loyihalarning amalga oshirilishi uchun ajratilgan yer maydonlari, bino va inshootlari maqsadli foydalanilmasa, tadbirkorga, aholiga naf keltirmasa, bu har tomonlama zarar deyish mumkin. Qiziriq tumanidagi “Takiya” mahallasi hududida joylashgan umumiy yer maydoni 3,2 gektar, qurilish maydoni shundan 5116 kvadrat metr bo‘lgan sobiq “Oxunboboyev MCH MMTP” bino-inshooti “Agroxizmat Agrokompleks” MChJga “Chorvachilik kompleksini” tashkil etish loyihasini amalga oshirish uchun ajratib berilgan edi. Afsuski, mazkur loyiha amalga oshirilmaganligi sababli hozirda ushbu bino-inshoot qarovsiz ahvolga kelib qolgan.
Ushbu holatdan xabardor bo‘lgan Surxondaryo viloyat hokimi zamonaviy chorva kompleksi tashkil etish uchun barcha zarur infratuzilmaga ega mazkur bo‘sh obyekt va unda amalga oshirilishi rejalashtirilayotgan loyiha taqdimoti bilan tanishdi. Aytish kerakki, hechdan ko‘ra kech deganlaridek, loyihaga ko‘ra “Surxon Cotton Textile Cluster” MCHJ xorijiy korxonasi tomonidan xorijdan nasldor chorva mollari keltirilib, “Chorvachilik kompleksi” tashkil etiladi. Natijada esa aholining go‘sht va sut mahsulotlariga bo‘lgan talabi qondiriladi. Qolaversa, bo‘sh ish o‘rinlari yaratilib, ishsiz aholining bandligi ta’minlanadi.
H.Kamolova
