Muzrabotlik Xolmirza Otaqulov oilasi, 2 nafar voyaga yetmagan farzandi bilan ijarada yashaydi. Kam-ko‘sti, kemtigi ko‘p. Ro‘zg‘orning g‘ori esa to‘lay demaydi. Qora qozonni qaynatish, farzandlari qornini to‘qlash, ustini butlash uchun ota tinimsiz mehnat qilishi kerak. To‘g‘ri, Xolmirza aka mehnatdan qochadigan inson emas, taqdirning bunday sinovlariga qarshi turib, ertangi kuni nurafshon bo‘lishiga umid bog‘lashdan, shukrona qilishdan to‘xtamaydi.
Ana shunday shukronalik hissi muborak oyda o‘z mukofotini berdi. Saxovatpesha tadbirkor tomonidan Xolmirza akaga bir bosh qora mol ehson qilindi. Eshigini qoqib kelgan mahalla faollarining bu tuhfasi Otaqulovlar xonadonini quvonchga to‘ldirdi.
Aytish kerakki, qo‘li ochiq, aholiga mehr-oqibat, saxovat ko‘rsatuvchi tadbirkor insonlar safi ortib, ana shunday ehsonlar ila xonadonlarga yaxshilik ulashilmoqda.
H.Baxtiyorova
