Qadriyatlar xalq tomonidan unutilmas ekan, u mangu yashaydi. Qalblarga ezgulik urug‘ini qadab, jon-jonimizga, qonimizga singiydi. Ezgu fazilatlarni mujassam etadi-da, avlodlardan-avlodlarga meros o‘tib yashayveradi. Yurtga bahor Navro‘z bilan boshlanganidek, urf-odatlarimizni, an’analarimizni yodga soladi.
Boysun kengliklarida Navro‘z bayrami “Boqiy qadriyatlar” shiori ostidagi tadbirga ulandi-yu ong-u shuurlarga milliy ruhni olib kirgandek bo‘ldi.
Bu yo‘lda esa kayvoni momolarimiz, chechalarimizning xizmatlari benihoya katta. Ayni ularning odatlarimizni maromiga yetkazib, yoshlarga targ‘ib qilishlarida bosh-qosh bo‘lishlari qiziqish va e’tiborni yanada oshirdi. Tadbirda momolarimiz boshchiligida sumalak sayli tashkil etildi. Milliy taomlarimiz tayyorlanib, hunarmandchilikning qadimiy turlari qayta jonlangandek bo‘ldi.
Surxondaryo viloyati hokimining o‘rinbosari, Oila va xotin-qizlar boshqarmasi boshlig‘i Zulxumor Xidirova, xotin-qizlar faollari, otinoyilar ishtiroki tadbirning ahamiyatini yanada oshirdi. Ayniqsa, tumandagi 57-son umumta’lim maktabida hunarmand ayollar ishtirokida hunarmandchilik ko‘rgazmalari namoyishi barchaning e’tiborini tortdi.
H.Kamolova
