Ayolni uy bekasi, doimo yumushlar bilan yoki oshxonada kuymalanib yurgan holda tasavvur etamiz. Ular butun bir ro‘zg‘or tashvishlari, farzand tarbiyasidan ortib, o‘zlariga vaqt ajrata olmaydi ham. Shunda ham ayol bundan nolimaydi, e’tibor kutmaydi. Ha, ayol uchun bu ishlar sportdek gap, shu bilan chiniqadi deydiganlar ham yo‘q emas.
Ammo, nozik xilqat vakilalari ham o‘zlariga vaqt ajratishlari, hayotni uy yumushlaridan tashqarida ham ko‘rishlari lozim. Uzun tumanida tuman tibbiyot birlashmasi oilaviy poliklinika tibbiy xodimlari hamda mahallalar xotin-qizlari o‘rtasida “Sport nafislik va salomatlik manbai” shiori ostida sport musobaqalari ayollarga ana shunday imkonni bera oldi.
Xotin-qizlar voleybol o‘ynadilar. Shaxmat-shashkada aqllarini charxladilar. Basketbol to‘pini raqib jamoadan munosib himoya qilib, beayov bellashdilar. Asosiysi musobaqa samimiy ruhda, ko‘tarinki kayfiyatda o‘tdi. Har bir ishtirokchi vaqti mazmunli o‘tganidan quvondi. Albatta, ishtirok izsiz, besamar ketmadi. Munosib ishtirok etganlar g‘olib sifatida e’tirof etildi, sovg‘alar bilan taqdirlandi.
H.Baxtiyorova
