Barcha sohada bo‘lgani kabi maktab ta’limi tizimida ham raqamlashtirish jarayoni amaliyotga tatbiq etilmoqda. Ya’ni, 2022-2023-o‘quv yilidan boshlab maktab bitiruvchilariga elektron shahodatnoma berish tartibi joriy etiladi. Bu esa ortiqcha byurokratik to‘siqlarning oldini olish bilan birga qulaylik ham yaratadi. Qolaversa, maktab bitiruvchisi shahodatnomasini yonida olib yurishi shart bo‘lmay qoladi. Oliygohga o‘qishga hujjat topshirishning onlayn imkoniyati yaratiladi.
Mazkur elektron shahodatnomaning davlat namunasi hamda shahodatnomalarni berish tartibi hukumatning tegishli qarori asosida tasdiqlandi. Ayni vaqtda esa elektron shahodatnoma platformasi (e-shahodatnoma.uz) ishlab chiqilib, tegishli vazirlik va idoralarning elektron bazasiga integratsiya qilinayotir.
Ma’lumot uchun aytish kerakki, elektron shahodatnomaga QR-kod tasviri tushirilib, uni istalgan vaqtda elektron platforma orqali tekshirib olish yoki shahodatnoma yo‘qotib qo‘yilgan taqdirda dublikat olish uchun ovora bo‘lmasdan shu zahotiyoq elektron bazadan qayta yuklab olish mumkin bo‘ladi.
Hilol
