Stipendiant bo‘lish talaba-yoshlarning bilim va izlanishlarini munosib baholaydigan va rag‘batlantiradigan, o‘ziga bo‘lgan ishonchini oshirib, kelgusida yanada shijoat ila harakat qilishiga undaydigan kuchdir. Buning uchun talaba a’lo baholarga o‘qishi, iqtidor va layoqatini ko‘rsata olishi, faol va tashabbuskor bo‘lishi lozim.
Stipendiant nafaqat ma’lum muddat davomida pul mablag‘i bilan rag‘batlantiriladi, balki oliygohning keyingi bosqichlarini davom ettirish imkoniga ham ega bo‘ladi. Istagan yosh ana shunday stipendiyalarga nomzodini taklif etib, g‘oliblik uchun kurashishi mumkin.
Ana shunday davlat stipendiyalari sonining yana bittaga ortgani esa talaba-yoshlar imkoniyat va imtiyozlarini kengaytiradi. O‘zbekiston Respublikasi Prezidentining jahon tarixida o‘chmas iz qoldirgan betakror siymolardan biri Zahiriddin Muhammad Bobur tavalludining 540 yilligini keng nishonlash to‘g‘risida qarori qabul qilindi. Qarorga ko‘ra 2023-2024-o‘quv yilidan boshlab oliy ta’lim muassasalari talabalari uchun Zahiriddin Muhammad Bobur nomidagi davlat stipendiyasi ta’sis etiladi.
Tarix va geografiya yo‘nalishlarida tahsil olguvchi talabalargina ushbu davlat stipendiyasiga nomzodlik qilishlari mumkin. Qarorda Vazirlar Mahkamasi uch oy muddatda mazkur davlat stipendiyasini tayinlash tartibi to‘g‘risidagi nizomni tasdiqlashi belgilangan.
H.Baxtiyorova
