Ishsizlarning o‘zini o‘zi band qilishlari, foydali ish bilan mashg‘ul bo‘lishlari, ishbilarmonlik muhitini yaratishlari uchun keng imkoniyat va imtiyozlar yaratilgan. Bot-bot takrorlanayotgan xabar va yangiliklarda ana shunday fuqarolarning kasb-hunarga o‘qitilib, o‘z biznesini yo‘lga qo‘yayotganligi, doimiy daromad manbaiga ega bo‘lish bilan birga qo‘shimcha ish o‘rni yaratayotganliklari aytilmoqda. Buning uchun tijorat banklari orqali imtiyozli kredit mablag‘lari ajratilib, manzilli yo‘naltiriladi. Muammoga ana shunday yechim topilayotgani ko‘plab ishsizlarning hayotda, jamiyatda o‘z o‘rnini topishiga xizmat qilayotir.
Sherobodlik Ibodulla Ibodov ham 33 million so‘m kredit mablag‘i bilan o‘z ishiga qo‘l urdi. Odamlar chiqit sifatida tashlayotgan chiqindilarga ikkinchi hayot berishni reja qildi va chiqindilarni qayta ishlashga tayyorlash faoliyatini yo‘lga qo‘ydi. Mazkur oilaviy korxonada bugungi kunda 6 nafar fuqaroning bandligi ta’minlangan.
Sherobod tuman hokimligida Aksiyadorlik tijorat Xalq banki tuman filiali tomonidan tadbirkorlikni rivojlantirish va aholiga o‘zini band qilish uchun ajratilgan kreditlar salmog‘i va natijalari yuzasidan tashkil etilgan navbatdagi media turda imtiyozli kredit mablag‘lari sarhisob qilindi. Imtiyoz o‘zini oqlayotgani, xalqimiz ahli bundan o‘rinli foydalanayotgani e’tirof etildi.
Hilol
