Vatan muqaddas. Bu tuyg‘uni anglagan borki, uni asrab-avaylashdek sharafli burch uchun xizmatga shay. Yurtimizda esa o‘zbekning har bir o‘g‘loni Vatan tinchligi, sarhadlar daxlsizligi uchun jonini-da berishga tayyor. Yillar davomida yurtimiz boshiga tushgan sinovlarda, tahlikali kunlarda mard o‘g‘lonlarimiz sinashta bo‘ldi, Vatan uchun jonini qalqon qildi. Ularni Vatan, el-u xalq hech qachon unutmaydi. Doimo qalbida, xotirasida saqlab, yod etadi.
“Vatanparvarlik oyligi” doirasida Surxondaryo viloyat hokimi Ulug‘bek Qosimov vatan sarhadlarini himoya qilish chog‘ida halok bo‘lgan qahramonlarimiz oilalari hamda faxriylar holidan xabar oldi. Termiz tumanidagi yurt tinchligi yo‘lida mardlarcha halok bo‘lgan serjant Muxiddin Eshtemirov oilasida bo‘ldi.
Viloyat rahbari yurt qahramonining onasi bilan suhbatlashib, ko‘nglini ko‘tarish maqsadida mardlarcha halok bo‘lgan o‘g‘lonning nomiga iliq fikrlar bildirdi. Ushbu oilaga moddiy yordam, sovg‘alar hamda oziq-ovqat mahsulotlari topshirildi.
Sohibjamol
