Tasavvur qiling, yaqin kishilaringizdan kimnidir to‘satdan tobi qochib qoldi. Telefon go‘shagini olasiz-u, zudlik bilan tez yordam xodimlariga qo‘ng‘iroq qilasiz. Shunday vaziyatlarda shifokorlarning tezroq kelishi uchun entikib, besaranjom bo‘lasiz. Ammo, yo‘llarning notekisligi, o‘nqir-cho‘nqirlari sababli tez yordam tezda yetib kela olmaydi.
Yo‘lning o‘ydim-chuqur joylari faqat tez yordam xodimlariga noqulaylik tug‘diribgina qolmay, shu yo‘ldan harakat qilayotgan barcha og‘ir-u yengil avtomobillar uchun haqiqiy muammo. Shu sababdan, Jarqo‘rg‘on tumanining “Maslahattepa”, “Zartepa”, “Eski qishloq”, “Qumqishloq” va boshqa bir qator mahallalarda “og‘ir hududlar”ni ta’mirlash ishlari olib borilmoqda. Ta’mirlash ishlariga yosh-u qari birdek mas’ul bo‘lib, mahallalarning ko‘rkiga-ko‘rk qo‘shishda o‘zlarining qo‘lidan kelgan barcha ishlarni amalga oshirishmoqda. Jarqo‘rg‘on tumanida olib borilayotgan ishlar mamlakatimizda yuritilayotgan islohotlarning amaldagi kichik bir uchquniga aylandi.
D.Otaqulova
