Bugungi kunda jamiyatimizda Volontyorlar haqida keng qamrovli tushunchalar paydo bo‘lmoqda. Bu ham o‘z-o‘zidan ularga bevosita qiziqish bildirayotganlar sonining ortib borayotganini anglatadi. Aynan bu sohada, xususan, Surxondaryoda o‘zgarishlar ko‘zga ko‘rinarli darajada.
“O‘zbekiston davlat va fuqarolik jamiyati bilan hamkorlikda ta’lim, o‘zaro muloqot va zaif guruhlarning radikallashishiga qarshi barqarorligini oshirish orqali zo‘ravon ekstremizmning oldini olishga ko‘maklashish” loyihasi doirasida “Barqaror hayot” xalqaro ijtimoiy-ma’rifat markazi volontyorlari, viloyat Yoshlar ishlari agentligi hududiy boshqarmasi va Volontyorlar assotsatsiya a’zolarining salohiyatini oshirish mavzusida 3 kunlik seminar-trening tashkil qilindi.
Ertalabdan Xalqaro toifadagi trenerlarning ajoyib, interaktiv o‘yinlari bilan boshlangan treningga Termiz shahridagi “Arbat” restorani mezbonlik qildi. Bevosita ko‘ngilli volontyorlar salohiyatini oshirishni maqsad qilgan treningning birinchi kunida “NNT va volontyorlik faoliyati” mavzusida fikr almashilgan bo‘lsa, ikkinchi kuni “Tanqidiy fikrlashni rivojlantirish” borasida bilimlar boyitildi. Treningning so‘nggi kunida “Katta yoshdagilarni o‘qitishning asoslari” haqida ma’lumotlar berildi.
Loyiha davomida ishtirokchilarga turli xil topshiriqlar, vazifalar berildi. Topshiriq shartiga asosan birinchi jamoa o‘rgangan ma’lumotlarini harakatlar orqali ifoda etishi, ikkinchi jamoa esa o‘rganganlari yuzasidan ertak aytishlari kerak edi. Bu topshiriq bugungi kunda yoshlardan talab qilinayotgan tanqidiy fikrlashni oshirish va bilimlarini mustahkamlash uchun xizmat qiladi.
Dastur yakunida ishtirokchilarga maxsus sertifikatlar topshirildi.
Kamola Mingto‘rayeva
