Bahodir Jalolov — bu nom o‘zbekman deganning ko‘nglida g‘urur va iftihor tuyg‘usini uyg‘otadi. To‘g‘ri-da, alp bo‘lsa shunday bo‘lsin. Bahodir Jalolov o‘zbekning farzandiga, chempioniga aylanib ulgurdi. Uning janglarini katta ishtiyoq bilan kuzatadigan, qo‘llab-quvvatlaydigan bo‘lganimiz rost.
Bahodirning professional boksdagi 11-jangi ham hech bir yurtdoshimizni e’tiborsiz qoldirmadi. U professional boksning og‘ir vazn toifasida (+90,7 kg) Nyu-Yorkdagi jang kechasida ringga ko‘tarildi. Showtime tomonidan o‘tkazilayotgan musobaqada o‘zbek o‘g‘loniga belgiyalik Jek Mulovayi (11-2-1, 7 KO) raqiblik qildi. Jang 8 raundga mo‘ljallangan edi. Bahodir esa barcha raundlarda ochkolar bo‘yicha ustunlik qildi va 6-raund oxirida raqibini nokdaun holatiga tushirdi. So‘nggi raund boshida esa nokaut ro‘y berdi.
Natija hech birimizni hayron qoldirmadi. G‘alaba Bahodir Jalolov tomonda. Ha, hamyurtimiz nokautli seriyasini davom ettirdi.
S.Davlatova
