Kasb-hunar maktablari qisqa muddatlarda yoshlarni kasb va hunarga o‘rgatib, mustaqil hayotga tayyorlashi bilan ahamiyatli. Qo‘lida hunari bor esa hor bo‘lmaydi. O‘z ishini yo‘lga qo‘yib, o‘zi va o‘zgalarni band qiladi.
Ho‘sh, kasb-hunar maktablarida berilayotgan ta’lim o‘zini oqlayaptimi? Yoshlar o‘z mutaxassisliklari bo‘yicha nechog‘lik bilim va mahoratga ega bo‘lishayotir?
Uzun tumani 2-son kasb-hunar maktabida Surxondaryo viloyati kasbiy ta’limni rivojlantirish va muvofiqlashtirish hududiy boshqarmasi tomonidan professional ta’lim muassasalari o‘rtasida “Kasb mahorati” ko‘rik-tanlovining viloyat bosqichidagi jarayonlar, shartlar ana shunday savollarga munosib javob bo‘ldi.
Ko‘rik-tanlovga viloyat professional ta’lim muassasalarining 28 ta kasb-hunar maktabining shahar va tuman bosqichlarida g‘olib bo‘lgan o‘quvchilar ishtirok etdi va sartaroshlik, oshpazlik, tikuvchilik hamda ustachilik kabi 8 ta yo‘nalish bo‘yicha bellashdilar.
Hakamlar hay’ati eng avvalo ishtirokchilarning o‘z ishlariga yondashuviga e’tibor qaratdilar. Yangidan-yangi g‘oyalar yaratishni hush ko‘radiganlar ishi e’tibordan chetda qolmadi. Tadbir so‘ngida g‘oliblar estalik sovg‘a va diplom bilan taqdirlandilar.
H.Baxtiyorova
