Kurashda g‘irrom yo‘q, bari halol. Shuning uchun ham unda alplar, er o‘g‘lonlar maydonga tushadi. Tinimsiz kurashlar esa kurashchini toblaydi, bilagini sinovdan o‘tkazib, zo‘rlar ichra zo‘r bo‘lishga imkoniyat yaratadi. Toshkent viloyatining Keles shahrida yunon-rum va erkin kurash sport turlari bo‘yicha 1999-2004-yillarda tug‘ilgan yoshlar (U23) o‘rtasida Osiyo chempionatiga saralash uchun bo‘lib o‘tgan Respublika turnirida bilagida kuchi bor o‘g‘lonlar maydonga chiqdi.
Kurash murosasiz kechdi. Tomoshabin hayajoni, hayqirig‘i, hakamlarning kuzatuvi kurashni qizitdi. Polvonlarga kuch berib, yanada yaxshi kurashishga chorladi. “Halol”, “chala” hayqiriqlari ostida g‘oliblar aniqlandi. Jarqo‘rg‘onlik Asomiddin Hasanovga teng keladigani topilmadi. O‘z vazn toifasida shoxsupaning yuqori cho‘qqisini egallab, 1-o‘ringa loyiq topildi va Osiyo chempionatiga ishtirok etish uchun yo‘llanmani qo‘lga kiritdi.
Ishonamiz, Osiyo chempionatida ham Surxon zamining polvoniga teng keladigan alp topilmaydi.
S.Murodova
