Insonning yoshi emas, qilgan ishlar, ezgu amallari ulug‘laydi. Hurmat va e’tiborga, e’tirofga sazovor etadi. Umrini mehnat-u mashaqqatda o‘tkazgan, peshona teri ila non topib, halol yashagan insonlar jamiyatda ibrat va namuna bo‘la oladi.
Angorlik Nurmamat bobo Usmonov 76 yoshni qarshi olgan esa-da, uyda o‘tirishni o‘ziga ep bilmaydi. Otaxon koʻp yillar davomida qishloq xoʻjaligi sohasida ishlagan, yerga mehr qo‘yib, u bilan tillashgan odam emasmi, bilagimda kuchim bor ekan, mehnat yo‘ldoshimdir deya tinim bilmaydi.
15 sotixli tomorqasining har bir qarich yeridan unumli foydalanib, daromad topib kelayotir. Hovlidagi mo‘jazgina bogʻ ko‘rganning bahri-dilini ochadi. Olma, oʻrik, shaftoli, anor kabi mevali daraxtlar g‘uj-g‘uj hosil berib, otaxon barakasini oshirsa, oshiryaptiki, elda kam qilgan emas. Nurmamat bobo payvandchilikda ham yaxshigina tajribaga ega, shuning uchun mevalarining xaridorlari ko‘p.
Erta bahorda yaxshi niyat ila qadagan nihollari esa bo‘y cho‘zib, pomidor, bulgʻor qalampiri, kartoshkalari pishib yetilgan. Mehnatkash bobo farzand va nabiralariga eng yaxshi namuna, ular bobosining qavatidan o‘tib, yerni yumshatishga, begona o‘tlardan holi qilishga yordam berishadi. Otaxon mehnati ortidan daromad topayotganidan shukrda.
S.Murodova
