Ha, hech bir soha insonni va davlatni sportchalik tez fursatda dunyoga tanitib, mashhur qila olmaydi. Tanilish va tanitish esa oson bo‘lmaydi. Bu g‘alaba zamirida mehnat, mashaqqat, tinimsiz harakat yotadi. Shuning uchun ham ular ko‘plarga ibrat va namuna bo‘la oladi. Tokio-2020 yozgi olimpiya o‘yinlari hali yodimizdan ko‘tarilganicha yo‘q. O‘zbekiston g‘alabasini mushtoqlik bilan kutdik. Ekran oldida hayajonlarimiz bir olam bo‘lgandi. Ana shunday o‘yinlarda rekord o‘rnatib, sovrindorlar bilan uchrashish kishiga zavr-shavq ulashsa, yosh sportchilarga motivatsiya beradi. Kelgusi odimlarida o‘zlariga bo‘lgan ishonchni kuchaytiradi. Xuddi shunday ishonch uyg‘otish maqsadida Termiz olimpiya va paralimpiya zaxiralari kollejida O‘zbekiston dzyudo federatsiyasi va dzyudo sport turi bo‘yicha O‘zbekiston milliy terma jamoasi ishtirokida mahorat darsi o‘tkazildi.
Mahorat darsida O‘zbekiston dzyudo federatsiyasi raisining o‘rinbosari, Portugaliyaning Lissabon shahrida o‘tkazilgan faxriylar o‘rtasidagi Jahon chempionatining kumush medali sovrindori Begzod To‘raboyev, O‘zbekiston milliy terma jamoasi bosh murabbiysi, London-2012 olimpiadasining oltin medali sohibi Ilias Iliadis, Rio-2016 yozgi Olimpiya o‘yinlarining bronza medali sohibi Diyorbek O‘rozboyev, Tokio-2020 Olimpiya o‘yinlari bronza medali sohibi Davlat Bobonov hamda bir guruh taniqli sportchilar ishtirok etdi.
Mehmonlar o‘zlari haqida gapirib berishdi. Qiziqishlari, hayot tarzi, jang maydonida qo‘llaydigan o‘ziga xos usullari yosh sportchilarda katta qiziqish uyg‘otdi. Shuningdek, chempionlar bilan birgalikda shug‘ullanish, yuzma-yuz maydonga chiqish barchani ruhlantirib yubordi. Bun kabi mahorat darslari yoshlarga g‘alaba yo‘lida katta motivatsiya berishiga shubha yo‘q.
Hilol
