Xalqaro musobaqada kuchli uchlikdan biri

Qozog‘istonning Qarag‘anda viloyatidagi “Spassk” o‘quv markazida “Aybin” xalqaro harbiy-vatanparvarlik musobaqasi bo‘lib o‘tdi. Musobaqada ishtirokchilar harbiy-amaliy ko‘pkurash sinovlaridan o‘tishlariga to‘g‘ri keldi. Aytish kerakki, ushbu sinovlar yigit-qizlar o‘rtasida o‘zaro do‘stona raqobat muhitini yaratdi.
Musobaqada 43 ta jamoa vakillari ishtirok etib, belgilangan shartlarni bajarishdi. Har bir jarayon va shartlar qiziqarli va murosasiz kurashlarga boy bo‘ldi. Jamoalar harbiylashgan estafeta, arqon tortishda o‘zaro kuch sinashishgan bo‘lishsa, qurolni noto‘liq holda sochib-yig‘ish sharti, ayniqsa, qiziqarli kechdi. Ommaviy qirg‘in qurollaridan himoyalanish vositalaridan foydalanish, pnevatik miltiqda o‘q otish paytida ishtirokchilar zavq-shavqqa to‘lishdi. Turnikda tortilish sharti jismoniy imkoniyatlarni namoyon etgan bo‘lsa, intellektual savodxonlik va badiiy havaskorlik yo‘nalishlarida ham sinovlar qiziqarli va maroqli o‘tdi.
Musobaqa yakuniga ko‘ra Qozog‘iston terma jamoasi I o‘rinni, O‘zbekiston terma jamoasi II o‘rinni egalladi.