Qishloq xo‘jaligi mahsulotlari yetishtirib, daromad ko‘radigan oila va fuqarolar bugungi kunning qahramonlari sifatida e’tirof etilayotir. To‘g‘ri-da, o‘zidagi imkondan unumli foydalanib, o‘z yo‘lini topayotganlar, mehnati ortidan rizqi butun bo‘layotganlarni har qancha e’tirof etsa arziydi.
Ana shunday mehnatkashlardan biri Boysun tumanidagi “Gaza” mahallasida yashovchi Jasurbek Suvonovdir. U o‘z tomorqasida 2 sotixlik issiqxona qurdi-da, yilning issiq mavsumida ekadigan ekinlarini qishda ham yetishtirishni o‘yladi. Issiqxona bitgach, bodring ekib, mahalliy aholini erta bahordan bodring bilan siyladi. Jasurbek Suvonov tomorqasidagi bir qarich yerni ham bo‘sh qo‘ymaydi, issiqxonadan tashqaridagi ochiq yer maydonida esa kartoshka yetishtirishni yo‘lga qo‘ygan.
Haqiqatan ham ushbu fuqaroning ishi, tirishqoqligi tahsinga sazovor, ibrat va namuna qilib ko‘rsatgulik. Jasurbek mahalladoshlariga ham o‘z tajribalarini o‘rtoqlashib, ekin-tikin qilishning o‘zigagina ayon jihatlarini ham o‘rgatib kelmoqda.
S.Murodova
