Bir shisha ichimlik suvining ortida iste’molchi ko‘rmaydigan katta jarayon turadi. Suvni tayyorlash va filtrlash, laboratoriya nazorati, qadoqlash, saqlash va yetkazib berishning har bir bosqichi mahsulot sifatiga ta’sir qiladi. Shu bois ichimlik suvi ishlab chiqarish biz uchun oddiy mahsulot tayyorlash emas, avvalo iste’molchi oldidagi mas’uliyatdir.
“Stork Valley” jamoasi faoliyatida ham aynan shu tamoyil ustuvor. Korxonamiz uchun ishlab chiqarish hajmini oshirish qanchalik muhim bo‘lmasin, sifat va xavfsizlik masalasi undan oldinda turadi. Chunki iste’molchi dasturxoni uchun tanlagan mahsulotimizga ishonch bildiradi. Bu ishonch esa bir kunlik emas, har bir ishlab chiqarish jarayonida shakllanadi.
Ichimlik suvi ishlab chiqarishda sifatni ta’minlash faqat tayyor mahsulotni tekshirish bilan cheklanmaydi. Suv manbasidan tortib, uni iste’molchiga yetkazib berishgacha bo‘lgan jarayon doimiy nazoratni talab qiladi. Shu sababli korxonamizda texnologik jarayonlarni takomillashtirish, zamonaviy uskunalardan foydalanish va laboratoriya nazoratini kuchaytirish rivojlanishning muhim yo‘nalishlari sifatida qaralmoqda.
Bugungi ishlab chiqarishda texnologiya alohida ahamiyatga ega. Avtomatlashtirilgan tizimlar jarayonlarni aniq boshqarish, inson omili bilan bog‘liq xatolarni kamaytirish va mahsulot sifatini barqaror saqlash imkonini beradi. Kelgusida ishlab chiqarish jarayonlarini yanada raqamlashtirish orqali suvni tayyorlash, filtrlash, qadoqlash va nazorat qilish bosqichlarini samaraliroq boshqarish imkoniyatlarini kengaytirish ko‘zda tutilmoqda.
Biroq texnologiyaning o‘zi yetarli emas. Har qanday uskuna ortida uni boshqaradigan mutaxassis turadi. Shu bois korxonamizda xodimlarning bilim va malakasini oshirish, ishlab chiqarish madaniyatini mustahkamlash va har bir jarayonga mas’uliyat bilan yondashish rivojlanish strategiyasining bir qismi sifatida qaraladi.
Ishlab chiqarish samaradorligi esa faqat mahsulot hajmi bilan o‘lchanmaydi. Suv va elektr energiyasidan oqilona foydalanish, chiqindilarni kamaytirish, qadoqlash materiallarini tejash ham korxonaning iqtisodiy va ekologik mas’uliyatini belgilaydi. Resurslarni tejash bir tomondan tabiatga yuklamani kamaytirsa, ikkinchi tomondan ishlab chiqarish xarajatlarini maqbullashtirishga xizmat qiladi.
Shu bilan birga, mahalliy ishlab chiqaruvchining imkoniyatlari ko‘p jihatdan iqtisodiy muhitga ham bog‘liq. Ishlab chiqarish xarajatlarining oshib borayotgan bir sharoitida soliq yukining maqbul bo‘lishi korxonaning bo‘sh mablag‘larini texnologik yangilanish, laboratoriya bazasini mustahkamlash, yangi liniyalarni ishga tushirish va xodimlar malakasini oshirishga yo‘naltirish imkonini beradi.
Shu nuqtayi nazardan, aylanmadan olinadigan soliq stavkasini 4 foizdan 1 foizgacha kamaytirish taklifi ishlab chiqaruvchi uchun qo‘shimcha imkoniyat sifatida ko‘rilmoqda. Bunday yengillikdan maqsad faqat soliq xarajatlarini kamaytirish emas, balki bo‘shagan mablag‘ni yana ishlab chiqarishga qaytarish, yangi texnologiyalarga sarmoya kiritish va mahsulot sifatini oshirishdir.
Korxonamiz uchun keyingi bosqich ham shu imkoniyatlarni to‘g‘ri yo‘naltirish bilan bog‘liq. Ishlab chiqarish quvvatlarini kengaytirish, mahsulot assortimentini boyitish, texnologik jarayonlarni takomillashtirish va iste’molchi talabini chuqur o‘rganish orqali korxona o‘z mahsulotining bozordagi o‘rnini yanada mustahkamlashni maqsad qilmoqda.
Chunki bugungi iste’molchi uchun mahsulotning narxi bilan bir qatorda uning sifati, xavfsizligi va ishlab chiqaruvchiga bo‘lgan ishonch ham muhim. Demak, biz uchun rivojlanishning asosiy mezoni shunchaki ko‘proq ishlab chiqarish emas, balki yaxshiroq ishlab chiqarishdir.
Jamoamiz uchun kelajakdagi maqsad ham aynan shundan iborat: sifatni saqlagan holda ishlab chiqarishni kengaytirish, zamonaviy texnologiyalardan foydalanish, resurslarni tejash va iste’molchi ishonchini oqlash. Mahalliy ishlab chiqaruvchining kuchi ham, istiqboli ham avvalo mana shu mas’uliyatdan boshlanadi.
Nargiza Butayeva,
“Stork Valley” MCHJ rahbari
