Denov tumanidagi “Yangi hayot” mahallasida yashovchi tadbirkor Charos Abdullajonova “Charos tortlari” brendi ostida qandolatchilik faoliyatini yo‘lga qo‘yib, bugun 30 nafardan ortiq xotin-qizning bandligini ta’minlamoqda. Tadbirkorning faoliyati Denov tumani hokimligining Oila va xotin-qizlar bo‘yicha mas’uli Ozoda Karimova tomonidan o‘rganildi.
Charos Abdullajonova 2021-yilda “Ayollar daftari” orqali Xalq bankidan 33 million so‘m kredit olib, o‘z xonadonida tort va shirinliklar tayyorlashni boshlagan. Dastlab uch nafar xotin-qizni ish bilan ta’minlagan tadbirkor 2023-yilda faoliyatini rasmiylashtirib, ishlab chiqarish va savdo ko‘lamini kengaytirdi.
Bugungi kunda uning faoliyati orqali 30 nafardan ortiq xotin-qiz daromad topmoqda. So‘fi Olloyor va “Mehr-oqibat” mahallalarida savdo hamda ishlab chiqarish nuqtalari tashkil etilgan, Z. M. Bobur mahallasida esa yangi nuqta ochish ishlari olib borilmoqda.
Media-tur davomida jurnalistlar ishlab chiqarish jarayoni va yaratilgan ish o‘rinlari bilan tanishdi.
Ushbu faoliyat xotin-qizlar tadbirkorligini qo‘llab-quvvatlash, ularning iqtisodiy faolligini oshirish va yangi ish o‘rinlari yaratishda amaliy tashabbuslarning ahamiyatini ko‘rsatadi.
