Qumqo‘rg‘on tumanida boshqaruv organlari hamda Favqulodda vaziyatlarning oldini olish va bartaraf etish davlat tizimi (FVDqT) hududiy quyi tizimi xizmatlari ishtirokida qo‘mondonlik-shtab o‘quv mashg‘ulotlari boshlandi. Mashg‘ulotlar tabiiy va texnogen xususiyatli favqulodda vaziyatlar oqibatlarini tezkor va samarali bartaraf etishga qaratilgani bilan ahamiyatlidir.
O‘quv mashg‘ulotining birinchi kunida xizmatlarning o‘zaro hamkorligini mustahkamlash, tezkor boshqaruvni yo‘lga qo‘yish hamda kuch va vositalarni muvofiqlashtirilgan holda safarbar etish bo‘yicha muhim vazifalar belgilab olindi.
Yig‘ilishda tuman hokimi — Fuqaro muhofazasi boshlig‘i F.Xoliqov hamda viloyat Favqulodda vaziyatlar boshqarmasi boshlig‘i birinchi o‘rinbosari Sh.Abduramatov rahbarligida xizmatlarning favqulodda vaziyatlarda harakat qilish rejasi ko‘rib chiqilib, amaliy ijro yuzasidan tegishli ko‘rsatmalar berildi.
Mazkur mashg‘ulotlar favqulodda vaziyatlarga tayyorgarlik darajasini oshirish, xizmatlar o‘rtasidagi hamkorlikni mustahkamlash va aholi xavfsizligini ta’minlashda muhim o‘rin tutadi.
