Jismoniy tarbiya jamiyat taraqqiyotining muhim omillaridan biri bo‘lib, u nafaqat inson salomatligini mustahkamlaydi, balki yoshlarning ma’naviy-irodaviy sifatlarini ham shakllantiradi. Bugungi globallashuv davrida sog‘lom va barkamol avlodni tarbiyalash har bir davlatning ustuvor vazifasiga aylangan. Shu ma’noda, O‘zbekistonda ham sport va jismoniy tarbiya masalasiga alohida e’tibor qaratilmoqda. Xususan, O‘zbekiston Respublikasi Sport vazirligi tomonidan yoshlar o‘rtasida sportni rivojlantirish, infratuzilmani yaxshilash va iqtidorli sportchilarni qo‘llab-quvvatlash borasida keng ko‘lamli ishlar amalga oshirilmoqda.
Yoshlar hayotida jismoniy tarbiyaning o‘rni beqiyosdir. Maktabgacha ta’lim muassasalaridan boshlab oliy ta’limgacha bo‘lgan jarayonda sport mashg‘ulotlarini tizimli yo‘lga qo‘yish sog‘lom turmush tarzini shakllantiradi. Sport bilan muntazam shug‘ullangan bola intizomli, maqsadga intiluvchan va jamoa bilan ishlash ko‘nikmasiga ega bo‘lib ulg‘ayadi.
Shu bois har bir ta’lim muassasasida zamonaviy sport maydonchalari, malakali murabbiylar va sport to‘garaklari faoliyatini kengaytirish muhim ahamiyatga ega.
Jismoniy tarbiya inson organizmiga ko‘plab ijobiy ta’sir ko‘rsatadi:
- Salomatlikni mustahkamlaydi – yurak-qon tomir va nafas olish tizimini yaxshilaydi.
- Immunitetni oshiradi – organizmning kasalliklarga qarshi kurashish qobiliyatini kuchaytiradi.
- Ruhiy barqarorlikni ta’minlaydi – stress va tushkunlikni kamaytiradi.
- Irodani chiniqtiradi – qat’iyat, sabr-toqat va g‘alabaga ishonchni shakllantiradi.
Sport bilan shug‘ullangan yoshlar zararli odatlardan yiroq bo‘lib, o‘z oldiga aniq maqsad qo‘yadi va unga erishishga intiladi.
Jismoniy tarbiya – sog‘lom turmush tarzining asosi, yoshlar kelajagining kafolatidir. Uni yoshlar hayotiga keng tatbiq etish orqali nafaqat sog‘lom, balki ma’nan yetuk, irodali va vatanparvar avlodni tarbiyalash mumkin. Chempionlarni kashf etish va sportni ommalashtirish esa mamlakat nufuzini xalqaro maydonda yuksaltiradi.
G‘iyos Fayzullayev,
Qumqo‘rg‘on tumanidagi 14-maktabning jismoniy
tarbiya fani o‘qituvchisi
