Kirib kelayotgan yangi yilda bir oilaning quvonchi butun bo’ladigan bo’ldi. Norasida qorako’zlar katta xursandchilik bilan ota-onasi yonida bo’lishadi. Majburiy ijro byurosi Jarqo‘rg‘on tuman bo‘limi ish yurituvida bo‘lgan aliment undirish to‘g‘risidagi ijro hujjati muddatidan oldin tamomlandi.
Tumanning “Mehnat-rohat” mahallasida yashovchi Sobirovlar oilasidagi kelishmovchiliklar ajrim darajasigacha yetib borgan edi. Davlat ijrochisi Sevara Yo‘ldashevaning sa’y-harakati bilan 10 yil avval oila qurgan yosh oila vakillari o‘zaro yarashtirildi. Quvonarlisi, endilikda uch nafar voyaga yetmagan farzand ota-onasi bag‘rida, sog‘lom oilaviy muhitda tarbiya topadigan bo‘ldi.
Yarashuv munosabati bilan aliment undirish to‘g‘risidagi ijro hujjati tamomlanib, aliment to‘lovchiga nisbatan qo‘llanilgan barcha cheklov choralari bekor qilindi.
