Sog‘liqni saqlash vazirligining yangi qaroriga ko‘ra, endilikda oilaviy poliklinikalarda yo‘llanmasiz ko‘rsatiladigan rejali tibbiy xizmatlar pullik asosda amalga oshiriladi.
Biroq davlat tomonidan kafolatlangan bepul tibbiy xizmatlar o‘z kuchida qoladi. Qo‘shimcha, ya’ni bepul paketga kirmaydigan xizmatlar fuqarolar tomonidan oldindan to‘liq to‘lanadi.
Pullik xizmatlardan tushgan mablag‘ning 75 foizi tibbiyot xodimlarini rag‘batlantirishga yo‘naltirilishi belgilangan. Maslahat, laboratoriya tahlillari va turli tashxis xizmatlari belgilangan narxlar asosida ko‘rsatiladi. Shunga qaramay, fuqarolar davlat kafolatlagan hajmdagi tibbiy yordamni mutlaqo bepul olish huquqiga ega bo‘lib qoladi.
Mazkur o‘zgarishlar tibbiyot xizmatlarining sifatini oshirish va tibbiyot xodimlarining mehnatini munosib rag‘batlantirishni maqsad qiladi.
