Surxondaryo viloyatida fuqarolarning yer uchastkalari va ularda qurilgan bino-inshootlarga bo‘lgan huquqlarini qonuniylashtirish bo‘yicha ishlar izchil davom ettirilmoqda. Xalq deputatlari viloyat Kengashining bo‘lib o‘tgan sessiyasida mazkur masala ko‘rib chiqilib, 1 255 nafar fuqaroning o‘zboshimchalik bilan egallangan yer uchastkalari hamda ulardagi bino-inshootlarga bo‘lgan huquqlari rasman e’tirof etildi.
Qaror natijasida fuqarolar va tadbirkorlarning mulk huquqlari mustahkamlanib, mulkiy va merosga doir nizolarning oldi olinmoqda, aholining huquqiy himoyasi va ijtimoiy kayfiyati yanada yaxshilanmoqda.
Ma’lumotlarga ko‘ra, shu kungacha viloyatda 2 222 nafar fuqaroning yer va mulkka doir huquqlari tan olingan bo‘lib, ushbu qarordan so‘ng umumiy ko‘rsatkich 3 477 nafarga yetdi. Hududda yer va mulk huquqlarini tartibga solish ishlari tizimli ravishda davom ettirilmoqda.
