Prezidentning 2025-yil 29-avgustdagi PQ–264-sonli qaroriga ko‘ra, tashabbusli byudjet jarayonlari yangi bosqichga ko‘tariladi. Endilikda bu jarayonda fuqarolar, deputatlar va davlat idoralari o‘rtasida yanada yaqin hamkorlik yo‘lga qo‘yiladi.
Qonunchilik palatasida 11 nafar deputatdan iborat maxsus komissiya tuziladi. U tashabbusli byudjet jarayonlarini muvofiqlashtiradi, loyihalarning ijrosini nazorat qiladi va tahlil qilib boradi.
2026-yil 1-yanvardan boshlab deputatlar har yili saylov okruglarida g‘olib chiqmagan, ammo hudud uchun muhim bo‘lgan 2 ta loyihani tanlaydi. Bu tanlov “Ochiq byudjet” portali orqali amalga oshiriladi. Tanlangan loyihalarni moliyalashtirish uchun har bir deputatga yiliga BHMning 8 ming baravari miqdorida mablag‘ ajratiladi.
2026-yil 1-fevraldan boshlab ijtimoiy ahamiyatga ega loyihalarni moliyalashtirishda yangi tartib joriy qilinadi. Agar fuqarolar loyiha qiymatining 50 foizini o‘zlari qoplasa, loyiha g‘olib deb topiladi va qolgan 50 foizini davlat byudjeti moliyalashtiradi.
Mazkur qaror orqali aholining tashabbuslari yanada keng qo‘llab-quvvatlanadi, hududlarni rivojlantirishda davlat va jamiyat o‘rtasida samarali hamkorlik yo‘lga qo‘yiladi.
