Sho‘rchi tumanidagi “Asl diyor” savdo kompleksidagi holatdan xabaringiz bor. Savdo kompleksida yongʻin chiqib, koʻplab tadbirkorlar talafot koʻrgandi. Qisqa muddatda hodisa oqibatlarini bartaraf etish va obyektni qayta rekonstruksiya qilish ishlari boshlab yuborildi.
Viloyat hokimi, fuqaro muhofazasi boshlig‘i Ulug‘bek Qosimov hududda amalga oshirilayotgan tozalash va qurilish ishlarini ko‘zdan kechirdi. Belgilangan topshiriqlar asosida qayta qurish va moslashtirish jarayonida savdo kompleksi hamda hududdagi bozorni yong‘in xavfsizligi va texnik me’yorlar talablariga to‘liq javob beradigan holatga keltirish masalalari ko‘rib chiqildi.
Shuningdek, viloyat rahbari savdo kompleksida faoliyat yuritgan tadbirkorlar bilan uchrashib, qurilish-ta’mirlash ishlari yakuniga qadar ularni vaqtinchalik boshqa joyga ko‘chirish, faoliyatini tiklashda amaliy yordam ko‘rsatish, ehtiyoji borlarga esa kreditlar ajratish bo‘yicha vazifalarni belgilab berdi.
