Termiz davlat universiteti arxeologiya yo‘nalishi doktoranti Jasur Turdiyev Tojikiston Milliy muzeyi, Tarix, arxeologiya va etnografiya instituti hamda Rossiya Fanlar akademiyasi Etnologiya va antropologiya instituti hamkorligidagi xalqaro ekspeditsiyada ishtirok etayotir.
Tadqiqotlar Tojikistonning “Sari Mayn” nomli qabriston hududida olib borilmoqda. Bu yerda V–VIII asrlarga oid 30 ga yaqin odam skeletlari topilgan. Ahamiyatli jihati shundaki, topilmalarning aksariyati mumiyalangan bo‘lib, ideal holatda saqlangan.
Antropologlar tomonidan qoldiqlarning yoshi, jinsi, kasallik belgilari aniqlanmoqda. Ushbu tadqiqotlar nafaqat Tojikiston, balki butun O‘rta Osiyo hududining qadimgi aholisi, ularning etnik kelib chiqishi va salomatlik holati haqida muhim ma’lumotlar berishi kutilmoqda.
