Hamkorlik aloqalari yangi bosqichda

Surxondaryo viloyati hokimi Ulug‘bek Qosimov Qozog‘iston Respublikasining O‘zbekistondagi Favqulodda va Muxtor elchisi Beybut Atamkulov boshchiligidagi delegatsiya bilan uchrashdi. Uchrashuv avvalida davlatlarimiz o‘rtasida do‘stona, yaqin qo‘shnichilik va o‘zaro manfaatli aloqalar rivojlanib borayotgani, xususan, joriy yil oktabr oyida o‘tkazilgan O‘zbekiston-Qozog‘iston hududlararo to‘rtinchi forumida Surxondaryo va Qarag‘andi viloyatlari o‘rtasida hamkorlik shartnomasi imzolanganligi qayd etildi.
Mazkur kelishuv ijrosini ta’minlash hamda o‘zaro hamkorlik istiqbollarini belgilash maqsadida Qarag‘andi viloyati mas’ullari ham delegatsiya tarkibida tashrif buyurganligi ta’kidlandi. Muloqotlar jarayonida hududlararo eksport-importni jadallashtirish va hamkorlik aloqalarini yangi bosqichda rivojlantirish maqsadida mavjud imkoniyatlarni ishga solish muhimligi qayd etildi. Bunda Termiz xalqaro savdo markazi faoliyati muhim ahamiyat kasb etishi alohida ta’kidlandi.
Qator loyihalarni amalga oshirish bo‘yicha berilgan takliflar asosida mutaxassislar ishtirokida joylarda o‘rganishlar olib borilishi ma’lum qilindi.
Delegatsiyaning viloyatimizga tashrifi davom etmoqda.