Maktablarda yangicha baholash tizimi joriy etilmoqda

O‘qish-o‘rganish, mehnat va harakatlar baholanadi. Munosib baho ruhlantirsa, natijasiz harakat kishini tushkunlikka tushirib qo‘yishi hech gap emas. Bu esa to‘xtovsiz intilishga halaqit beradi. Demak, bahomiz doimo “5” bo‘lishi uchun unga mos va xos tarzda o‘qish lozim. O‘zbekiston Respublikasi Maktabgacha va maktab ta’limi vazirining 2023-yil 16-avgustdagi “Tajriba-sinov maktablarida bilimni baholashning yangi tartibini joriy etish toʻgʻrisida”gi 248-son buyrugʻining ijrosini ta’minlash maqsadida Surxondaryo viloyatining barcha hududlaridan tanlab olingan jami 30 ta tajriba-sinov maktablarining o‘quv ishlari bo‘yicha direktor o‘rinbosarlari uchun Termiz tumanidagi 16-maktabda o‘quv amaliy seminar tashkil etildi.
Seminarda malakali trenerlar tomonidan yangi baholash tizimi bo‘yicha ma’lumotlar berib o‘tildi va uni umumta’lim maktablarida joriy qilish bo‘yicha ko‘rsatmalar taqdim etildi. Seminar ishtirokchilari mavzu yuzasidan o‘zlarini qiziqtirgan savollariga javob olishdi. O‘quv yili davomida yangi baholash tizimi tajriba-sinov sifatida joriy etilayotgan ushbu maktab bilan hamkorlikda ishlashga kelishib olindi.