Bandixon tumanida 2026-yil davomida jami 58 kilometr avtomobil yo‘llari asfaltlandi. Bu ishlar aholining yillar davomida yo‘l infratuzilmasi bilan bog‘liq muammolarini bartaraf etish, qatnov qulayligi va xavfsizligini oshirishga xizmat qilmoqda.
Jumladan, qariyb 10 kilometr davlat ahamiyatidagi avtomobil yo‘llari, 30 kilometr ichki yo‘llar hamda 18 kilometr yo‘l «Tashabbusli budjet» loyihalari doirasida ta’mirlandi. Ayniqsa, «Navro‘z» mahallasi hududidan o‘tuvchi D162 «Qumqo‘rg‘on – Kofrun – Boysun» avtomobil yo‘lining 5 kilometrlik qismi asfaltlangani aholi uchun muhim qulaylik yaratdi.
Yangilangan yo‘llar natijasida harakat ravonlashib, manzillarga yetib borish osonlashdi. Eng muhimi, bu ishlar aholining kundalik hayotini yengillashtirish, hududlar o‘rtasidagi transport aloqalarini yaxshilash va Bandixon taraqqiyotiga xizmat qilmoqda.
