O‘zbekistonda Ijtimoiy himoya milliy agentligi tizimidagi muassasalar endilikda pulli xizmatlar ko‘rsatishi, tarbiyalanuvchi va yashovchilar tayyorlagan mahsulotlarni sotishi hamda bo‘sh turgan davlat mulkini ijaraga berishi mumkin.
Bu imkoniyatlar Vazirlar Mahkamasining 2026-yil 17-sentyabrdagi 493-son qarori bilan belgilandi. Undan tushadigan mablag‘lar muassasalarning rivojlantirish jamg‘armalariga yo‘naltiriladi.
Pulli xizmatlar qatoriga reabilitatsiya, tibbiy diagnostika va davolash, qarab turish, defektolog va psixolog xizmatlari kirishi mumkin. Bunda davlat tomonidan kafolatlangan xizmatlar bepul ko‘rsatiladi.
Shuningdek, muassasalarda hunarmandchilik, gul va ko‘chatlar yetishtirish, oziq-ovqat va qandolat mahsulotlari tayyorlash kabi faoliyatlarni yo‘lga qo‘yishga ruxsat beriladi. Xizmat oluvchilarning o‘z xomashyosidan tayyorlangan mahsulotlar sotilganda, tushumning vositachilik haqidan tashqari qismi ularning bank hisobvarag‘iga o‘tkaziladi.
Bo‘sh turgan bino va inshootlar esa ijtimoiy-mehnat reabilitatsiyasi, kasbga o‘rgatish va pulli xizmatlar ko‘rsatish uchun tadbirkorlarga ijaraga berilishi mumkin.
Qaror muassasalarning budjetdan tashqari mablag‘larini ko‘paytirish, xizmatlar ko‘lamini kengaytirish va tarbiyalanuvchi hamda yashovchilarning mehnat ko‘nikmalarini rivojlantirish uchun qo‘shimcha imkoniyat yaratadi.
