Mamlakatimiz xavfsizligi va sarhadlarimiz daxlsizligini taʼminlashda harbiy xizmatchilarning jismoniy va jangovar shayligi bilan bir qatorda, ularning maʼnaviy-ruhiy barqarorligi ham oʻta muhim oʻrin tutadi. Ayniqsa, xizmat burchini sidqidildan bajarayotgan har bir posbonning ruhiy teranligi, jamoaviy ahilligi va har qanday vaziyatda hamjihat harakat qila olish koʻnikmasi muvaffaqiyatning bosh omilidir.
Kuni kecha Surxondaryo viloyatida joylashgan harbiy qismlarning birida harbiy xizmatchilarning ruhiy shayligini oshirish, jamoada sogʻlom maʼnaviy-ruhiy muhitni yanada mustahkamlash maqsadida maxsus psixologik trening tashkillashtirildi.
Interaktiv usullar va amaliy mashqlar
Tadbirlar ochiq va samimiy muloqot tarzida tashkil etilib, harbiy xizmatchilarning erkin fikrlashi va bir-birini yaqindan anglashi uchun barcha zarur sharoitlar yaratildi. Trening mashgʻulotlari davomida harbiy xizmatchilar davra shaklida oʻtirib, turli interaktiv usullar va psixologik mashqlar orqali oʻz fikr hamda mulohazalarini erkin bayon etish imkoniyatiga ega boʻldilar.
Suhbat va mashgʻulotlar jarayonida qoʻllanilgan “Tanishuv aylanasi”, “Ishonch koʻprigi”, “Ismlar zanjiri”, “Savol-javob” va “Toʻpni uzat” kabi interaktiv mashqlar ishtirokchilarning bir-biriga boʻlgan ishonchini oshirishga hamda har bir harbiy xizmatchida jamoaga daxldorlik va masʼuliyat hissini kuchaytirishga xizmat qildi. Ushbu interaktiv oʻyinlar shaxsiy tarkibning oʻzaro muloqotga kirishishdagi gʻovlarni bartaraf etib, bir-birini chuqurroq tushunishiga zamin yaratdi.
Ruhiy barqarorlik va jangovar shaylik
Trening jarayonida harbiy xizmatchilar bir-birining fikrini diqqat bilan tinglash, qarashlarni hurmat qilish va yuzaga kelishi mumkin boʻlgan turli vaziyatlarda muammolarni birgalikda, jamoaviy hal etish koʻnikmalarini rivojlantirdilar. Harbiylik xizmati oʻziga xos masʼuliyat va ruhiy zoʻriqishni talab etishini inobatga olgan holda, bunday mashgʻulotlar ruhiy zoʻriqish hamda charchoqni kamaytirish, stress holatlarining oldini olish va natijada kunlik xizmat samaradorligini sezilarli darajada oshirishga yordam beradi.
Mashgʻulotlar davomida ishtirokchilar oʻrtasida shakllangan samimiy va doʻstona muhit jamoada sogʻlom maʼnaviy-ruhiy holatni qaror topdirish, harbiy xizmatchilar oʻrtasidagi oʻzaro ishonchni mustahkamlash hamda harbiy intizom va tartib-qoidalarni yanada kuchaytirishda muhim omil boʻlib xizmat qiladi.
Bir soʻz bilan aytganda, bunday psixologik trening mashgʻulotlari harbiy jamoalarda hamjihatlik, oʻzaro hurmat va ishonchni mustahkamlash, harbiy xizmatchilarning maʼnaviy-ruhiy tayyorgarligini sifat jihatidan yangi bosqichga koʻtarishda beqiyos ahamiyat kasb etadi. Shu kabi maʼnaviy-ruhiy va psixologik tadbirlarni muntazam ravishda tashkil etish harbiy jamoaning yanada jips, ahil hamda har qanday xizmat-jangovar topshiriqlarni sifatli bajarishga tayyor boʻlishini taʼminlaydi.
Islomjon Muxamadaliyev,
Harbiy xizmatchi
