Yoshlar o‘rtasida sog‘lom turmush tarzini keng targ‘ib etish, milliy sportimiz — kurashni ommalashtirish hamda iqtidorli sportchilarni saralash maqsadida Bosh prokuror kubogi musobaqasining Surxondaryo viloyat bosqichi yuqori saviyada o‘tkazildi.
Musobaqada vohaning shahar va tuman bosqichlarida g‘oliblikni qo‘lga kiritgan qariyb 120 nafar yosh polvon ishtirok etdi. Bellashuvlar erkaklar o‘rtasida 5 ta, ayollar o‘rtasida esa 4 ta vazn toifasida tashkil etildi. Bahslarda ishtirokchilar kurash bo‘yicha puxta tayyorgarligi va yuksak mahoratini namoyish etib, murosasiz bellashuvlar orqali g‘oliblik uchun kurash olib bordi.
Musobaqa yakunida o‘z vazn toifalarida g‘olib va sovrindor bo‘lgan sportchilar diplom, medal hamda esdalik sovg‘alari bilan taqdirlandi.
