“Besh tashabbus paralimpiadasi” nogironligi bo‘lgan yoshlarning sport salohiyatini namoyon etish, ularni sog‘lom turmush tarziga jalb qilish va iqtidorini qo‘llab-quvvatlashga xizmat qilmoqda. Respublika bosqichi yakunlari Qumqo‘rg‘on tumani sportchilari uchun ham muvaffaqiyatli bo‘ldi.
Musobaqa natijalariga ko‘ra, tuman vakillari 1 ta kumush va 2 ta bronza, jami 3 ta medalni qo‘lga kiritdi. Parabadminton bahslarida Neftchilar mahallasidan Faxriddin To‘laganov kumush medal sohibiga aylangan bo‘lsa, To‘g‘on mahallasidan Oygul Qudratova bronza medalni qo‘lga kiritdi.
Parashaxmat musobaqalarida esa Yangihayot mahallasidan Dilshoda Xayitova faxrli 3-o‘rinni egallab, Qumqo‘rg‘on delegatsiyasi hisobiga yana bir bronza medalni taqdim etdi.
Sportchilarning ushbu natijalari tumanda paralimpiya sportini rivojlantirish va iqtidorli yoshlarni qo‘llab-quvvatlash borasidagi ishlar samarasi sifatida e’tirof etilmoqda.
