Aholini qiynayotgan muammolarni tinglash, ularga qonuniy va amaliy yechim topish davlat organlari faoliyatining muhim yo‘nalishlaridan biri hisoblanadi. Shu maqsadda Surxondaryo viloyati hokimi Ulug‘bek Qosimov tomonidan navbatdagi shaxsiy qabul o‘tkazilib, fuqarolarning murojaatlari atroflicha ko‘rib chiqildi.
Qabul davomida 14 nafar fuqaroning 17 ta turli masala yuzasidan murojaati eshitildi. Ularda ijtimoiy qo‘llab-quvvatlash, bandlik, kommunal xizmatlar, yer munosabatlari va boshqa dolzarb yo‘nalishlarga oid masalalar ko‘tarildi.
Murojaatlarning 6 tasi qabul jarayonining o‘zidayoq ijobiy hal etildi. Qo‘shimcha o‘rganish, muayyan muddat hamda tegishli resurslarni talab etadigan murojaatlar bo‘yicha mas’ul rahbar va mutasaddilarga aniq topshiriqlar berildi. Har bir murojaatning ijrosi uchun muddatlar belgilab, ularning bajarilishi qat’iy nazoratga olindi.
Fuqarolar murojaatlari bilan ishlash tizimini yanada takomillashtirish, aholini o‘ylantirayotgan muammolarga tezkor va samarali yechim topish borasida bu kabi shaxsiy qabullar muntazam ravishda davom ettiriladi.
