O‘zbekistonda 16 yoshga to‘lmagan bolalarning ijtimoiy tarmoqlardan foydalanishini qonun bilan cheklash taklifi muhokama qilinmoqda. Bu haqda Maktabgacha va maktab ta’limi vaziri E’zozxon Karimova ma’lum qildi.
Uning so‘zlariga ko‘ra, mazkur masala yuzasidan parlament deputatlari va senatorlari bilan dastlabki muhokamalar o‘tkazilgan. Yaqin kunlarda qonun loyihasi ishlab chiqilib, jamoatchilik muhokamasiga taqdim etilishi rejalashtirilgan.
Vazirning ta’kidlashicha, maqsad bolalarni telefondan butunlay mahrum qilish emas, balki ularning internet va ijtimoiy tarmoqlardan xavfsiz, mas’uliyatli hamda me’yor asosida foydalanishini ta’minlashdir.
Mazkur tashabbus raqamli xavfsizlikni kuchaytirish, yoshlarni zararli kontent va kiberxatarlardan himoya qilish yo‘lidagi muhim qadamlardan biri sifatida baholanmoqda.
