Termiz shahridagi Yoshlar markazida Surxondaryo viloyati hokimi Ulug‘bek Qosimov ishtirokida umumta’lim maktablarining iqtidorli bitiruvchilari bilan uchrashuv o‘tkazildi. Tadbirda Termiz shahridagi maktablarni yuksak natijalar bilan tamomlagan 41 nafar bitiruvchiga oltin, 7 nafariga esa kumush medallar tantanali ravishda topshirildi.
Shuningdek, xalqaro va respublika miqyosidagi fan olimpiadalari hamda nufuzli tanlovlarda muvaffaqiyat qozongan, oliy ta’lim muassasalariga muddatidan oldin talabalikka tavsiya etilgan bitiruvchilar ham rag‘batlantirildi.
Ma’lumotlarga ko‘ra, joriy o‘quv yilida Surxondaryo viloyatidagi 996 ta umumta’lim maktabining 328 nafar bitiruvchisi oltin, 83 nafari esa kumush medal sohibiga aylandi. Iqtidorli yoshlarni e’tirof etish ularning ilm-fanga bo‘lgan qiziqishini yanada oshirish, yangi yutuqlarga ilhomlantirish hamda mamlakatning intellektual salohiyatini yuksaltirishga xizmat qilmoqda.
