1-iyuldan boshlab savdo va xizmat ko‘rsatish sohasidagi barcha yuridik shaxslar yagona UzQR tizimi orqali to‘lov qabul qilish imkoniyatini yaratishi shart bo‘ladi. Mazkur tizim xaridorlarga istalgan bank yoki to‘lov ilovasi orqali bitta QR-kod yordamida to‘lov qilish qulayligini taqdim etadi.
Markaziy bank ma’lumotiga ko‘ra, UzQR orqali amalga oshirilgan to‘lovlar uchun sotuvchilardan tranzaksiya summasining 0,65 foizi miqdorida komissiya undiriladi. Biroq ayrim holatlarda xaridorlardan ham qo‘shimcha yig‘im olinayotgani kuzatilmoqda. Regulyator bunday to‘lovlar tizimning rasmiy tarifiga kirmasligi va ayrim ishtirokchilarning tashabbusi ekanini ma’lum qildi.
Mutaxassislar esa mavjud komissiya stavkalari naqd pulsiz to‘lovlarni rag‘batlantirish o‘rniga, ayrim tadbirkorlar va iste’molchilar uchun qo‘shimcha xarajatlar keltirib chiqarishi mumkinligini ta’kidlamoqda. Shu bois UzQR tizimining samaradorligi va tariflar masalasi jamoatchilik muhokamasidagi dolzarb mavzulardan biriga aylanmoqda.
