Yozgi ta’til davrida bolalarning bo‘sh vaqtini mazmunli tashkil etish nafaqat dam olish maskanlari, balki ziyo maskanlarida ham samarali yo‘lga qo‘yilmoqda. Bu jarayon yosh avlodning ijodiy salohiyatini rivojlantirish va kitobxonlik madaniyatini oshirishda muhim ahamiyat kasb etmoqda.
Surxondaryo viloyat bolalar kutubxonasida yosh kitobxonlar ishtirokida navbatdagi ijodiy mashg‘ulot o‘tkazildi. Unda bolalar rangli qog‘ozlar va turli bezak vositalaridan foydalanib, qo‘l mehnati asosida ijodiy ishlar yaratdilar.
Mashg‘ulot davomida kutubxonachilar bolalarga amaliy ko‘nikmalar berib, ularning tasavvuri, mustaqil fikrlashi va ijodkorlik qobiliyatlarini rivojlantirishga alohida e’tibor qaratdi.
Bunday tadbirlar bolalarning yozgi ta’tilini mazmunli o‘tkazish, estetik didini shakllantirish hamda kitobxonlikka bo‘lgan qiziqishini yanada oshirishga xizmat qilmoqda.
