Jamiyatda saxovat va insonparvarlik qadriyatlarini amalda namoyon etayotgan insonlar ko‘payayotgani quvonarli holatdir. Ana shunday ezgu tashabbus Sariosiyo tumanining “Sebzor” mahallasida yashovchi Mavjuda Odinayeva xonadonida amalga oshirildi.
II guruh nogironligi bo‘lgan fuqaro yashayotgan ushbu oila uzoq vaqt elektr uzilishlari sabab qiyin sharoitda kun kechirayotgan edi. Saxovatpesha insonlar ko‘magida xonadonga zamonaviy quyosh panellari o‘rnatib berildi.
Natijada oila endilikda yorug‘ va qulay sharoitda yashamoqda. Ushbu tashabbus nafaqat ro‘zg‘orga yengillik yaratdi, balki elektr energiyasi orqali qo‘shimcha daromad olish imkonini ham taqdim etdi.
Bu kabi ezgu ishlar jamiyatda mehr-oqibat va ijtimoiy birdamlik muhitini yanada mustahkamlashga xizmat qiladi.
