O‘zbekiston futbol assotsiatsiyasi milliy terma jamoaning Jahon chempionati uchun rasmiy timsoli — “Bek” ismli oq bo‘rini taqdim etdi.
Ta’kidlanishicha, oq bo‘ri turkiy xalqlar tarixida kuch, jasorat va erkinlik ramzi hisoblanadi. Shu bilan birga, “Oq bo‘rilar” nomi yillar davomida O‘zbekiston terma jamoasining muxlislar orasidagi timsoliga aylangan.
“Bek” obrazi mahalla futbolida ulg‘aygan, katta orzular bilan yashaydigan va g‘alabaga intiluvchi yoshlar ruhini ifodalaydi. Ushbu timsol orqali muxlislar bilan turli loyihalar va uchrashuvlar tashkil etilishi rejalashtirilgan.
Eslatib o‘tamiz, O‘zbekiston milliy terma jamoasi o‘z tarixida ilk bor futbol bo‘yicha Jahon chempionatida ishtirok etadi.
