Surxondaryo viloyatida Qizil kitobga kiritilgan noyob pushti saqoqqushni noqonuniy ovlab, iste’mol qilgan fuqarolar aniqlandi. Holat Termiz tumanidagi Uchko‘l massivida yuz bergani ma’lum qilindi.
Tekshiruvlarda fuqarolar ovchilik bilan shug‘ullangani va ularda ov qurollari mavjudligi aniqlanib, qurollar vaqtincha olib qo‘yildi. Mutaxassislar hisobiga ko‘ra, ushbu noqonuniy harakat oqibatida tabiatga 206 million so‘mlik zarar yetkazilgan.
Holat yuzasidan to‘plangan hujjatlar prokuratura organlariga yuborildi.
Mutaxassislar bunday holatlar noyob hayvonot olamini saqlash, ekologik muvozanatni himoya qilish va biologik xilma-xillikni asrash masalasini yanada dolzarb etayotganini ta’kidlamoqda.
