O‘zbekistonning ilk milliy kosmonavti 2028-yil oktyabriga qadar fazoga uchirilishi rejalashtirilmoqda. Bu haqda “O‘zbekkosmos” agentligi ma’lum qildi.
Qayd etilishicha, kosmik parvoz 10–14 kun davom etadi va uning doirasida tibbiyot, biologiya hamda genetika yo‘nalishlarida ilmiy tajribalar o‘tkazilishi mumkin. Hozirda AQSH, Rossiya va Xitoy bilan hamkorlik masalalari yuzasidan muzokaralar olib borilmoqda.
Kosmonavtlarni saralash uchun maxsus hukumat komissiyasi tuziladi. Nomzodlardan oliy ma’lumot, xorijiy tillarni bilish hamda belgilangan jismoniy talablarga mos bo‘lish talab etiladi.
Mutaxassislar ushbu loyiha O‘zbekistonning kosmik tadqiqotlar, ilm-fan va zamonaviy texnologiyalar sohasidagi yangi bosqichini boshlab berishini ta’kidlamoqda.
