Surxondaryo viloyati hokimi Ulug‘bek Qosimov Niderlandiya Qirolligining O‘zbekistondagi Favqulodda va Muxtor Elchisi Niko Sxermers boshchiligidagi delegatsiyani qabul qildi.
Uchrashuvda ikki davlat o‘rtasidagi savdo-iqtisodiy, investitsiyaviy va ilmiy hamkorlikni kengaytirish masalalari muhokama qilindi. Ayniqsa, qishloq xo‘jaligi, logistika va yashil energetika yo‘nalishlarida tajriba almashish hamda malakali xorijiy mutaxassislarni jalb qilish muhim ahamiyat kasb etishi ta’kidlandi.
Shuningdek, Niderlandiya biznes vakillari Surxondaryodagi erkin iqtisodiy zonalar va istiqbolli loyihalarda faol ishtirok etishga taklif qilindi.
Mazkur muloqot viloyatga xorijiy investitsiyalarni jalb etish, yangi ish o‘rinlari yaratish va zamonaviy texnologiyalarni olib kirishda muhim qadam bo‘lishi qayd etildi.
